النعرة الكدابة

هى مصر احسن ولا الكويت 

ــــــــــــــــــــــــــــــــــــــــــــــــــــ

قبل ان يزايد علي وطنيتى المتزايدون ويسئ فهمى ممن يتصيدون الفرص لممارسة اساءة الفهم اقرأ كلامى للأخر ..

انا متأكد ان مجرد ان اى حد يطرح سؤال زى ده فى دى حاجة تضايق ،،معاك حق تضايق علشان اى بنى ادم فى الدنيا بيكون شايف بلدة دى احسن بلد فى الدنيا مهما كانت عيوبها،،بس انا عاوز اجاوب على السؤال بشكل ممكن يضايق شوية ،،

احنا كمصريين عندنا جملة بنقولها على طول لما تيجى سيرة الكويت او السعودية اواى بلد خليجى (احنا اللى علمناهم بعد ماكانوا بيرعوا الغنم ،،احنا اللى عالجناهم ،،احنا اللى درسنالهم ،،احنا اللى عملنالهم وسونالهم ) للأسف دى نظرة كتير منا ليهم ،،لكن مفيش حد بص للحال اللى هما فيه دلوقتى والحال اللى احنا فيه،عارفين ان هنا استحاله تلاقى ورقه على الأرض ،،انا مش هتكلم عن دبى او الدوحة او ابو ظبى انا هتكلم عن الكويت اللى هى تعتبر اقل من دول كلهم فى التحضر والتمدن والرقى ،،بلاش نتكلم عن البنيه التحتية من كبارى محترمة ،،وشوارع واسعة ،،وانارة على اعلى مستوى ووووووووو،،اول متسمع كدة على طول تلاقى اجابه اوتوماتيكيه بتتقال (ماهو لولا فلوسهم ولولا البترول كان زمانهم غرقانين فى الفقر والعتمة ) تعرف ان شماعة البترول اللى بنعلق عليها تخلفنا دى شماعة من اختراعنا احنا ،،احنا عندنا الموارد اللى لو استغلناها صح هنشوف مصر بجد ،،انا مش مبالغ انا بضايق قوى من النعرة الكدابة ونبرة الغرور اللى بنتكلم بيها دايما اننا اصحاب حضارة 7000سنة وفراعنة وابوالهول ،،واحنا اللى بنينا الاهرامات وحفرنا قناة السويس،،كل ده حقيقى لكن انت موقعك ايه دلوقتى ،وسط كل الدول اللى تجاوزتنا فى كل حاجة ،،واحنا عارفين برضوا ان اللى ملهوش تاريخ ملهوش مستقبل لكن احنا دلوقتى قدام وضع حالى ان الناس دى سبقانا بعشروميت سنه ضوئية من بتوع البوب ،،،

كل مشكلتنا اننا بنقعد نعيب على الدول انهم بتوع غنم وصحرا ووووووووووووو لكن محدش فينا اصلا بص لوضعهم الحالى ووضعنا الحالى ،،،،،،،،،،،

طول ماحنا بنفتخر بتاريخنا بس وبنتريق على تاريخهم يبقى احنا ماشيين فى سكة غلط ،،هما ناس عرفوا مواطن ضعفهم فقاموا بالالتفاف حولها ليتقدموا،،اما نحن فحدث ولا حرج نكابر على مواطن الضعف لينا ..

انا كتبت الكلام دة علشان نبره الغرور والتعالى اللى بشوفها عندنا لما بتيجى سيرة الدول دى ،،

انا وصلت لمرحله انى بقول ياريت مكنش لينا تاريخ وكنا من راعيين الغنم وبتوع صحرا ..

كل غرضى من الكلمتين دول ان الناس تبطل النعرة الكدابة والنظرة الفوقيه على حد كان تاريخه سئ او مكنش ليه تاريخ اصلا؟؟؟؟؟؟؟؟؟؟؟؟؟؟

دول كلمتين من شاب مغترب مقهور ومخنوق مما وصل اليه حال بلدة ...

ياريت مكنش ضايقتك ..واذا كنت ضيقتك متزعلش ياسيدى
 مصر ام الدنيا وهتفضل قد الدنيا 

وبكرة تشوفوا مصر 

ـــــــــــــــــــــــــــــــــــــــــ

محمود عبد الحميد مرسى