يا تليفزيون ... الرحمة
( إعلانات بالساعات )
فى التلفزيون عاملين كوبليه لكل البطاطين
سانتا مورا وسارتوجا مين عايز مين
علشان الشتاء محناش خايفين
إعلانات بالساعات بتقول اشترى تكسب ألوفات
والفنكوش حل الأزمات
الكل حيكسب عجلات
أو ساعة لضبط الأوقات
تيجى فاطمة تقول
بصوت زى الغول " جت جبت أومو "
"رحت جبت أومو " وراجل شحط كبير
يكبوا عليه مية زير
قال إيه سخانات أونو
وده كله وأنا قاعد
أعصابى اتحرقت وبشاهد
مستنى برامجنا التعليمية
وكل شوية يقولوا فقرة إعلانية
ويقول لك سر نجاح طاهر ابو زيد ف الكورة
جبنة المصريين جبنة مشهورة
والقنبورى ياحلاوة شباكه
ماخلاص انا دوبت فى شباكك
ويقولك رشيت بيرسول
رشيت ولا مارشيتش
والأبلة نظيفة قطنتها ما تكدبش
مش عارف اصدق مين ولا مين
فى التلفزيون عاملين كوبليه لكل البطاطين
ــــــــــــــــــــــــــــــــــــــــــــــــــــــــــــــــــ
مشاركة متميزة من صديق المجلة
الاستاذ / زين العابدين مرسى
أولاد نجم – بهجورة – نجع حمادى
ذكريات مجلة صوت طوخ 99 العدد الخامس
اسرة موقع طوخ المعمورة
جمعية شباب طوخ للتنمية
ليست هناك تعليقات:
إرسال تعليق
شارك برأيك