الجمعة، يوليو 29، 2016

محمد فاروق بك يكتب : معا ضد الغلاء في الزواج

معا ضد  غلاء الزواج هكذا تحدث الشيخ سليم جابر في الجزء الثاني من خطبة الجمعه وكم عجبني الشيخ سليم في فتح هذا الموضوع الخطير فهل نجد من يقف بجانب الشيخ ونقتل العادات والتقاليد التي تهدم المجتمع  ام نقف ضد الشباب واملة في استكمال نصف دينة فانا مع ياشيخ سليم في هذة المبادرة الجميلة وكل الشباب معك باذن الله وياريت نكون نحن بداية لتغير مجتمع ولا يكلف الله نفس الا وسعها ونيسر علي الشباب من اجل زواج ميسر ومبارك
مهو حرام ان جرام الدهب يبقا 490 جنيه والشاب يبقا مطالب انه يجيب 50 و 60 جرام دهب عشان يعجب ابو وام العروسه ويبقا قيمتها من قيمه الشبكه 
انتو متعرفوش احنا كشباب بنتعب وبنتبهدل وبنفحر ف الارض عشان نقدر نجيب حق الشبكه والمهر والشقه والعفش كل دا عشان اقدر اتجوز واعف نفسي
حرام اني عشان اتجوز وابني اسره واعف نفسي ادفع اكتر من ربع مليون جنيه.

صعوبه الجواز دي عقاب من ربنا علي الحجات اللي بنعملها والله.. احنا صعبناها علي بعض فربنا عقبنا بذنبنا وصعبه علينا وكل منغلي الجواز ونطلب حجات اكتر الحاجه تغلي اكتر وداخلين ف سباق ياتري مين هيدفع اكتر من التاني
هوا الشاب لما يدخل بيتك عشان يتجوز بنتك ويلاقيك بتطلب منه كل الحجات دي عشان ترضي تجوزه بنتك هل هيحترمها بعد الجواز ويقدرها ولا هيعاملها علي انها حاجه شاريها بفلوسه وتعب ودافع فيها الشئ الفلاني وكأنها جاريه شاريها ومن حقه يبهدلها لانه تعب علي ماشتراها.. هل هتتساوي بواحده اهلها وافقو ع الشاب لمجرد انه محترم وعارف ربنا وهيتقي ربنا فيها ؟!

يعني ايه قايمه بربع مليون ويعني ايه شبكه بخمسين الف ويعني ايه شقه وعفش بيعدي 150 الف هل دا جواز ولا تجاره ؟!.. هل ربنا هيرضي عن الجوازه دي ويبارك فيها ؟!

هيا بنتك اغلي وافضل ولا فاطمه بنت رسول الله ؟!

عارفين السيده فاطمه بنت رسول الله اتجوزت ازاي ؟! اقولكوا

اتقدملها سيدنا علي ابن ابي طالب ومكنش حيلته غير درع قديم الرسول قاله بيعه وادفع تمنه مهر للسيده فاطمه 

طب والاكل اللي كان ف فرحها هل جابوا اكل وحلويات من لابوار وطباخ وعملو ابن بوفيه ولا كان ايه ؟!
مكنش فيه بوفيه يا جماعه ولا كان فيه حتي لحمه كان الاكل عباره عن شويه سمنه ودقيق واتعجنو واتخبزوا والناس كلت 

طب والقايمه اللي ف جوازات بتبوظ بسبها كانت ايه ؟!
السيده كانت قايمتها حصيره ووساده وقربه للماء ورحي تطحن بها القمح..

بس ؟! اه والله بس 

طب واللبس اللي العروسه بتدخل بخمس شنط هدوم ولو نقص مفرش يحصل مصيبه ؟!
مكنش معاها غير ثوب قطيفه تلبسه لتتزين بيه لزوجها

طب والسكن هل كانت شقه اربع اوض وصاله وحمام ببانيو ومطبخ اربعه متر ؟!
لاء يا جماعه سيدنا علي مكنش حيلته سكن لحد ما احد الصحابه اتبرع بسكن لسيدنا علي يتزوج فيه اكراما لرسول الله

هل الجوازه دي ولا جوازتنا اللي ربنا بارك فيها ؟!

هل الجوازه دي نتج عنها مشاكل زي جوازتنا ولا عاشوا علي طاعه ربنا ؟!
هل الجوازه دي نتج عنها اولاد مش عارفين نربيهم ولا نعلمهم ولا نتج عنها سيدا شباب اهل الجنه سيدنا الحسن وسيدنا الحسين

سيدنا علي دخل مره علي السيده فاطمه فقال وجدها كلها تعبد الله فقالوا كيف ؟! قال يديها تحمل ابنها وترضعه ورجليها تلف بها الرحي لتطحن القمح وفمها تقرا به القرأن وتذكر الله فكانت كلها تعبد الله

المشكله ان كل سنه بقا فيه موضه عن السنه اللي قبلها.. سنه يقولوا لازم اتنين غساله وسنه اتنين تلاجه وسنه شاشه 46 بوصه وكومبيوتر وسنه الدهب يكتر وكل اب عاوز يميز بنته عن بنت فلان فيجيب حاجه اكتر وأغلى فيطلع واحد تاني يجيب اكتر وهكذا 

ف حديث بيقول "من سن سنه حسنه فله اجرها واجر من عمل بها الي يوم القيامه ومن سن سنه سيئه فله وزرها وورز من عمل بيها الي يوم القيامه"

تخيلو الراجل اللي قال لازم شبكه دهب للعروسه دا شال كام ذنب علي ذنبه ؟!

تخيلو الراجل اللي قال لازم اتنين غساله واتنين تلاجه دا شال كام ذنب ع ذنبه ؟!

فكروا يا جماعه ف الكلام دا وانصحوا بعض بيه والله السعاده ف الجواز عمرها مكانت بالدهب ولا القايمه ولا الشقه.. السعاده ف رضا ربنا واللي احنا بنعمله دا ضد الدين وربنا بيبغضه وبنشيل ذنوب جبال مع ذنوبنا..
معا من ضد الغلاء في الزواج 

ليست هناك تعليقات:

إرسال تعليق

شارك برأيك